Ulia cu bessu n’arulu ti ulia ca cotula li fronde nnargintate

Lu ientu no si fita llu schianteddhra ca tene li cchiù furti tiriate

Comu faci cu llassi stu paese  addò canusci e addò si canusciutu

Cu nu cielu paratu sempre ‘nfesta cu nu mare di seta e di vellutu?

Ulia cu bessu nu chiuppu suttile ca ‘ntra la terra sua resta chiantatu

E cinca vae luntanu stae sicuru ca addhra lu troa addonca l’ha lassatu

Comu la lindineddhra ti settembre tocca mi trou lu nitu ccchiù luntanu

E tocca partu scusu, cittu cittu e senza gente ca mi dae na manu

Ogghiu fazzu lu forte e cu no chiangu ma lu core si squagghia comu cera:

mi sentu nu fuggiascu condannatu, nu surdatu ca ha persu la bandiera!

L’amici so gentili e prantirusi ti trattanu comu unu ti famiglia

Ma quando stai luntanu ti li tua mara sape la festa e la iciglia

Quando ogne notte senza truei riggettu puru susu lu megghiu matarazzu

Sobbra a cuscini e lanzuli ti linu e cu li sentinelle allu palazzu

Siecuti lu pensieri ca si ndi ola e torna intra sti case e intra sti strate

Cu sente ‘ndore di pane ‘rrustutu, ti minunceddhre, ti fiche ‘nfurnate,

 e troa la sposa ca li manca l’aria comu nu ceddhru c’ha bbasciatu l’ale

comu na casa addò no trase sole, addò non c’è né pasca né natale

la vita dienta spasimu e turmientu e ogne mese pare na stagione

lu sangu ferve e ti mangia la stizza e l’esigliu diventa na prigggione!

                                                                  Luigi  Ruggeri